Azuzwu

- Fichta gh Igmir-

Asa , tamazirt bahra imqurn, gutn gis imzdaghn, tasswa gh tuzzumt n idrarn bahra yattuyn, bahra ighzzifn, ifk gis rebbi igran ligh llan tugt n ifrghan, ziyt, luz, argan….d kullu mad zzadn mddn …zund asngar, irdn, tumzin, ….hawln gis lfakit zund rmman, zenbuh, adil, ikwzarn….
Ittaf asa yan ughbalu bdda ingin , zgern amannes s tamazirt , bdun f snat trgwa..targwa yattuyn, d targwa idran.
Igran lidttafn ayt usa gant mnnaw, sutln i tamazirt zund : ighir uzer, lmlaln, amaluntk, ighunan, fighzer, fisil, asif n ayt bulm, du tazazzelt, timsal, tighwmert, du tazart, talukust, imawntswak, tasukt n tfrawt, du tghrat, ….igmir.
Akalad n igmir iga yan wakal bahra imqurn, itkurn s iferghan, uratissant man tasukt gis kkan, kusantn iyawn gh lajdud n lajdudensen, akalad bahra ifulkin ifjjijn, iga tamatart n asa, ityawssan bahra sers gr timizar yadnin, nttan arafllas izwur wanna yran aykchem s asa, razwar izri f igmir, wannad ikkan izzar, zund igh ikka tagmut, irayzwur f ighir uzer, gr ighir uzer d igmir, nttan aygan tamazirt n asa.
Mach ghiklli ityawssan igmir s ufulkins, ityawssan is ityawttaf, ar tinnin willi chibnin, i willi sul mzziyn, is uriêdil adkken agharas n igmir gh yid, fad ulmaqarn kra mawrirwin, , ghimkan af iggan igmir idsens gh ufessi, d usya, -le silence-, mn ligh tghli titrit n tiwudch.
Ar yan ddur, yan yid ligh gis huchen imzdaghnes willi ur anttannay…
Mnnaw n mdden ayslladn i agwalensen, inna yan gh iêyyaln n usa :
- iz htta ghad yad ittaf asays ?!!!

swangemn iêyyaln adsjjeln agwal n igmir, nkern yan yid n yat tagerst ismmidn, dun s igmir, iwin didsn lkasit , slhiln gh ugharas, ar zigizn gh wasif n sidaktir, ar kigh azn igmir, ibid yan gitsen inna :

-adur tnuchgem bahra, radasen nergs taghwrdin n ujarifan…ghwan n tama n wasif.

Inna yan yadnin :
-Igh ttafen adafn radakh zern !!!

Inna malk walli ssenkh gr iêyyaln :
- ajjn fllakh tikssadenk, hdutenk gh uhenkurenk..

mun ar ttidan s tisuraf fssusnin, ssksan….arasn ittachka gh mani bahra ur yaggugn adu n ugwwal.

- isatsslidm i gangansen…walaynni awddi ssennas !!
- mani ghik illa asays…haqqan gh wakalan ighwza wasif..sslidat mzyan !!
- yah !…ghin ukan aghakh ilkkem ahwachensen, mach ur nufi atn nnaz bahra.

Innays malk : tksut ak ssiwdn !!!

Mittin bahra s usays li ur a tzerra tit, inna malk :
-walaynni igat !!!manighas zzarn ayt tagmut !

Inna yan yadnin :
- rad inikh allun n salm, mach htta salm ura yut allun zund nttni… !

ar kkitn ganga, naqus, d allun…ar ittenduduy igmir gh tuzzumt n yid, ar issergha wul n williyas sfflidn…inna malk :
-trgha lfichta !!! serbi, serbi…rzem ilkasit !!!

akudan ligh rzemn ilkasit, ibid ganga, ibid allun, lah agwal, tffsa kullu dunit, ar tnuchugn tichmra n iferghan s imik n uzuzwu, ikchem asmmid ul n iêyyaln, bidn imik n uzemz ar tqeln, inna yan gitsen :

- madasn ijran…makh ad bidn ?!
- haqan salan.
- ngh haqan ssen mafd nuchka.

Gh uzemzan, shssan zund igh atnittanay kra, smuqeln fusgansen, tazelmat d tafasiyt, htta yan….amadal ingd gh tillas…lah itran…abla asif n ignwan aysmerqan gh ufllayan yaggugn…smeln iêyyaln tisuraf s taghwrdin…wirrind, iqama gisn lhal, ur lkemn illi ran, yut malk s ifassens :
- ullah arakh trwel khtad…ar yat twal yadnin
- ur nikh iz radakh ajjn ! innays yan gitsen

mach malk ijawbas :
- wakha..ranzer !!!


ligh zrin asif, fln igmir gh taghwrdin, isawl kra inna :
-wachan n malk, isskhssrakh lfichtankh !

inna yan yadnin :
- tawalad yuchkan, raten sserfufen !

tnna yat gr ichdran :
- ajjat awi wachan, ullah ayga ahwawiy, issusemt agwwalnekh, iêzza dars gangankh !!

fkent i tadsa du uzenzar n wayyur ihdan mnassens gh umedlu.